شاعر حزن .. سعد بن جزاء الميموني

امنيه اني اموت
كــلـن تمـنى في حيـاته اماني
وانا اتمنى امنـيه اني امـوت
مـــظـلـوم في دنيا بـها الله بلاني
عايش ولكن عايش انــسان مكبوت
عايش يــتـيـمٍ مـاعرفت الاماني
غصبٍ على اقبل انا الظلم بســكوت
الحظ ضدي والبــشر والــزماني
باسبابهم همي بدى يـلوتني لوت
حسره طوت قلبي وحـزنٍ طواني
الين حزني صار بالصدر منحوت
حتى حبيبي خان حبي وحـنانـي
وحط بفمي علقم وانا مذوقه توت
خان المحبه صار شــخـصٍ انـاني
وحرّم علي حتى اتصل اسمع الصوت
مادام صرحي انـهـدم مع كياني
وش تنفع الصرخه اذا فايـت الفوت
ايوب لو ساعه يكون بـمـكـاني
ماكان في صـبـره ترى تكتب بيوت
الموت ارحم من حـياتي اعاني
ولاظن فيه ارحم عليّه من الموت
ياسـعـد قـــلبي كان موتي لفاني
ويازينها لاصار جسـمي بتابوت
يارب حـقـق لي انا هــالاماني
ارجيك يامنجي نبيك من الـحـوت
ومادام مسموحه علينا الاماني
عندي امنيه وحـده انا ودي اموت

قلي بربك
قلي بربك يابعد..عمر..مغليك
وشلون خنت اللي محرم يخونك
وشلون هانت رجوتي يوم انا ارجيك
وشلون هانت دمعتي في عيونك
وشلون بعت اللي بهالناس شاريك
قلي علامك بعت ناسٍ يبونك
قلي بربك دامني بصدق هاويك
وشلون بحيا باقي العمر دونك
قلي بربك حالي اليوم يرضيك
طايح جريحٍ من سبايب طعونك
طايح جريحٍ انتخيبك واناديك
ودي تقول ابشر..حبيبي..ياعونك
واثرك تقول ابعد انا اليوم مابيك
وتروح تتركني بلحظة جنونك
وقف قبل لاتروح ربي يخليك
دامك رفضت احيا..حياتي بكونك
ارجوك قبري تحفره اليوم بيديك
يحرّم علي العيش يازين دونك

ماصدق انت ياخلي تخون
ياحبيبي ليه ياعمري تخون
ليه تغدربي وانا وافي معاك
دامك انت اللي على عمري تمون
ولوتبي عمري ترى عمري فداك
ودامك أغلى عندي من ضي العيون
ودامك أغلى عندي من هذا وذاك
كيف تهديني من كفوفك طعون
كيف ترميني على درب الهلاك
كيف حب سنين في عينك يهون
كيف تنسى قلب ماعمره نساك
كنت أظنك يابعد عمري حنون
وكنت اظنك صادقٍٍ لي في غلاك
وكنت اظنك يابعد عمري تصون
قلبي اللي فز من صدري وجاك
ياخساره غرتك ذيك الظنون
وغرك العاذل وعن حبي عماك
ماأصدق انت ياعمري تخون
ياخساره بعت في قلب شراك

وربي لنتحر
ياحبيب الروح تكفى لاتروح
لوتخليني وربي لنتحر
لاتخليني حبيبي للجروح
لاتخلي جفن عيني للسهر
لاتهد عزوم قلبي والطموح
لاتخليني لهمي والكدر
قمت اشوف الموت قدامي يلوح
وفي يمينه شفت لي حفرة قبر
ياحبيبي طالبك شفني انوح
ارتجيك بدمع عيني تنتظر
لورحلت لمين بشكيله وابوح
لجتمع هم وضيقه بالصدر
الحزن في دنيتي بادي يفوح
خلى دمعي فوق خدي ينهمر
خابرك ياصاحبي وجه سموح
ماتخليني وانا حالي خطر
شوف عينك واضح حالي وضوح
لاتخليني اطق من القهر
يعني تهمك حياتي؟لاتروح
ولو حياتي ماتهمك بنتحر

ياليتني محروم من نعمه الشووف
ياليتني ميت ولا عيني تشوف
خلي يزفونه على شخص ثاني
طعنت غدر جتني كماطعنت سيوف
يوم الحبيب اختار غيري ونساني
من صدمتي كني مقيد ومكتوف
وانااشوف الغير ياخذ مكاني
وحارت على شفاتي سؤالات وحروف
ليه الخيانه ليه قتل الاماني
كنت احسبه خلي وفي حالي يروف
واثره حكم باأعدام حبي وحناني
كنت احسبه ماله بهالعالم وصوف
كنت احسبه وافي ولاهواناني
واثري انخدعت وراحت سنيني حسوف
وضاعت حياتي وانتهت في ثواني
وصار الحزن والهم والجرح والخوف
صارو رفاقي يوم خلي رماني
وماتنفع الحسره ولاصفق الكفوف
ياموت ريحني تراني اعاني
وياليتني محروم من نعمة الشوف
ولاأشوف الغير ياخذ مكاني

ياحزن خاف الله
ياحزن قلي لى متى مبتليني
وياحزن خلني لو ثواني ابرتاح
خليت دمعي دوم في وسط عيني
ماشافت عيوني بشيرٍ للأفراح
وياحزن خاف الله ياحزن فيني
عجزت اقاوم ياحزن طعن الارماح
تكفى طلبتك ياحزن حس فيني
هديتني من كثر همك والجراح
وياحزن يكفي تسعةٍ من سنيني
اكذب واقول الحزن له يوم ينزاح
وياحزن تكفى خلني لاتجيني
خلني ابلحق وقت خلاني وراح
وياحزن تكفى ردني لم ضنيني
هو الوحيد اللي بجنبه ابرتاح