السلام عليكم ورحمة الله وبركاته

يسعدني ان اقدم لكم قصة قرأتها وحبيت مشاركتكم بها

اترككم مع القصة

المقدمة:

ما ابي اشرح معناتي منذ الطفوله مع السمنه
بس حبيت اذكر آخر معانات للسمنه بحياتي ومحاولات الرجيم وهي :
في بداية عام 2006 قررت اعمل رجيم كالعاده وكنت شاده حيلي لاني كنت اقول ان هذي آخر تجربة للرجيم مو لأني فاقده الامل بالعكس علشان اشجع نفسي ، وماكنت افكر بأي نوع من انواع العمليات الجراحية وكنت رافضتها نهائياً ، و كانت لي صديقة سمينه بس ما تبي تعمل رجيم ودايماً تقول ابي اعمل العمليه بس ضروفها مو سامحه لها وانا كنت اقول لها انتي مينونه والله حرام تقدرين تسوين رجيم وتنحفين ليش تعرضين نفسك للعمليات …. ومن هالكلام
بدأت الرجيم مع دكتور تغذيه معروف وابتعدت عن رجيمات الانترنت وكل القريبين على قلبي كانو يآزروني ويشجعوني وكان وزني 104 ونزل وزني بخلال 3 شهور وصار 94 وكنت متحمسه ومتشجعه .... وفجأة وبمرور الايام رجعت الكيلوات وزادت حصه الاكل وزاد الوزن بسرعه غير متوقعه وكل التعب والالم والجوع والمعاناة تبخرت .

احبطت كالعاده من بعد كل زياده وزن من بعد الرجيم لكن هذي المرة اثر على نفسيتي وايد لدرجة اني كرهت نفسي ماكنت اطيق اشوف نفسي بالمراية ولا احب اختلط بالناس وانعزلت عنهم ونفسيتي اصبحت عصبيه وبس ابي آكل ما احس بطعم الاكل بس ابي اترس معدتي وياريت ارتاح بعد بالعكس يضيق خلقي واقعد ابكي وماكنت افكر اعيد الرجيم مره اخرى .

وانا اتصفح الانترنت دخلت موقع الدكتور سلطان التمياط وقرأت كل مواضيع المنتدى والتجارب بكل تمعن وعشت لحظاتهم وحسيت كل واحد يقول مأساتي ويقول قصتي وشفت انهم بعد العملية خسو كثير فهذا شدني

اقتنعت وابي اسوي العمليه استشرت الاهل تقريبا موافقيني الراي بحثت عن رقم مستشفى سعد وكلمتهم وطلبت منهم تحويلي لعيادة الدكتور سلطان التمياط وعلى طول اتصلت
رن الهاتف
طووط ….. طووط
الو

الو مرحبا

ياهلا

اخوي لوسمحت حبيت اعرف كم تكلفة العملية

امم والله هذا السؤال اللي انا ما احبة

نعم !!! من معي عفواً هل هذي عيادة الدكتور سلطان

انا الدكتور سلطان !!!!!!!

بكل ربكه هلا دكتور انا من الكويت وحابه اعرف هل التحوير ام ربط المعده تناسبني وهل تصلح لي واقدر اعملها

كم وزنك وطولك

وزني 99 وطولي 165

هل عملتي رجيم من قبل

طول عمري سمينه واعمل رجيمات وانقص 15 كيلو واتركها ويزيد وزني الدبل

هل تعانين من امراض

معي كولوسترول

هل تحبين الحلا

ايه والله وجباتي الرئيسية كلها حلا

يعني عادي يصير اسوي تحوير

قال ايه عادي "

والله ماقصر كلم زوجي ورد على جميع اسئلتة زوجي كان مقتنع كثير بس في خوف علي بعيونه خليته يقرأ التجارب بالمنتدى وتقريبا اقتنع

استخرت ربي ودعيت كثير لله عز وجل اذا العمليه خير لي ولصحتي يارب سهلها واذا كانت ضاره لي ولعمليتي يارب ابعدها وابعدني عنها

رتبنا امورنا حددنا الموعد للعمليه مع المستشفى والدكتور والله انه ما قصر ساعدنا كثير في ترتيب موعد العمليه الذي يتناسب مع ترتيبات سفرنا للخبر وتحدد موعد العمليه بعد 3 اسابيع من الاتصال على الدكتور وفي هذي الايام زاد وزني 5 كيلوات ما خليت اكله ما اشتهيت آكلها ما خليت مطعم الا رحت له طول اليوم اكل لدرجه اصبح طعم الاكل متشابه ما فيه اي لذه ووصل وزني 104 كيلو

سافرنا للمنطقه الشرقيه.....

بالتحديد للخبر وصلنا العصر على طول وصلنا لمستشفى سعد رحنا قسم الدخول ماشاء الله كنا منبهرين بفخامه المستشفى وبنظامها وقسم الدخول بس خبرناهم انا من الكويت على طول اعرفونا بالاسم عبينا بعض الاوراق وقالنا لهم نبي نروح نتغدى ونرجع لكم عطونا 4 ساعات وقالو بالليل بس ترجعون نعمل دخول للمريضه والله ورحنا مجمع الظهران وقلت للي معاي ابي اكلة معتبرة لانها راح تكون اخر وجبه والله يزيد النعمه كان طلبي غير موفق وما كملت الوجبه وقلت حرام اخر شي يدخل معدتي ما يكون لذيذ وبس نفسي انسدت دخلت المستشفى .... عملو لي بعض التحاليل وجابو لي وجبة عشاء ما اخذت منها الا العصير نفسي انسدت وكنت مستغربه من نفسي مع العلم بان يبدأ الصيام الساعه 12 بالليل وانا توقفت عن كل شي الساعه 9 بس ريجي كان ناشف مهما اشرب ماي ما ارتوي ... وكان باستقبال الدكتور المساعد للدكتور سلطان "مايحضرني اسمه" رحب فيني وجلس معاي واخذ معلومات عن حالتي الصحيه

وبعده حضر دكتور البنج اخذ بياناتي اللازمه للبنج وعطاني سيناريو البنج ما قصر بعدها صليت ودعيت ربي يسهل لي امري والساعه 2 الفجر نمت

يوم العمليه ... صحيت الصبح صليت الفجر وما رجعت نمت والصبح جو الممراضات عطوني ابرة مسيله للدم وقاسو حرارتي وضغطي وقدمو لي لبس العمليات كنت منتظرة الدكتور سلطان والساعه 8 صباحا جاني الدكتور قعد يشرح لي العمليه

تجهزت ولبست لبس العمليه والساعه 11 نزلت غرفة تحضير العمليه ركبو وايرات في ظهري وقاسو ضغطي وحرارتي والله اني ما كنت خايفة وهذا كل بفضل رب العالمين انزل علي السكينه وابعد الرهبه من قلبي حتى يوم دخلت غرفة العمليات ماخفت وقاعده اسولف مع دكتور سألته انت دكتور البنج قال ايه وبعدها دخل نور دكتور سلطان سلم على الجميع وطمني لاتحاتين اي شي وكل شي راح يكون ساتر اثناء العمليه ما عدا جزء البطن إللي راح نشتغل فيه ركبو الابره بيدي وكان دكتور البنج يقول ان هذي الشكه هي العمليه كلها لا تخافين وكانو الدكاتره فوق راسي فقلت لهم انا ما جيت من الكويت ليه عندكم الا انا متأكده اني سلمت نفسي تحت أيادي امينه توكلت على الله وقلت اللهم لاسهل إلا ما جعلته سهل وانت تجعل الحزن سهل وحسيت بخدار في جسمي وعلى طول تخدرت

فتحت عيوني من بعد البنج سمعت حمدلله على السلامه .... حسيت بألم بمعدتي وبس قلت آآآه راح الالم ودخت ونمت على طول اعتقد عطوني مهدأ الموصول بالمغذي بعدها حسيت نفسي بغرفتي بالجناح

كنت انام واصحى ما اذكر اي شي بس بالليل اشوي صحيت كلمت اهلي بالتليفون وطمنتهم وطبعا المغذي موجود ومافي شي دخل معدتي وما كنت احس بجوع وألم بصيط وكل ما زاد الالم اضغط على زر موصل بأبره فيها مسكن مثبتينها على المغذي على طول تنضغط ويبين مفعولها ويزول الالم

اليوم الثاني .... حالتي مستقره ومافي الم يذكر وكنت تحت تاثير الادويه والمسكنات التي اخذها بالوريد مشيت اشوي بالغرفه وكنت طول اليوم نايمه

اليوم الثالث .... في الصباح تم ازالة القصطرة و نزلت غرفة الاشعه بالكرسي المتحرك وعملت الاشعه الاولى وشربت الصبغه وكنت خايفة من الطعم بس والواحد يقدر يتحمل وطلب مني دكتور الموجود بالاشعه ان ارجع للغرفة وهو راح يخبر الدكتور بنتيجه الاشعه وبعد ساعه ارجع له لعمل اشعه ثانيه بس بدون صبغه ... وبعد ما طلعت غرفتي بنص ساعه تقريبا خبرني الدكتور ان نتيجه الاشعه ممتازه ولايوجد تسرب ارتحت كثيرا وحمدت ربي وشكرته لاني كنت منتظره هالوقت وحسيت ان الحين انجحت العملية بسلام كل بفضل ربي وانجاز دكتور سلطان الله يطول عمره ، وعملو لي غيار للجروح ومازال الدرين موصول ، وقدرت آخذ شور وكان الدكتور سلطان يوميا يزورني ويتطمن علي مع العلم انه بإجازة لكنه ما قصر وجابوا لي الوجبة

وهي عباره عن عصير تفاح وجلي وشوربه وماء والله ماقدرت آخذ اي شي وغصبت نفسي بنص أقلاص ماء فقط .... في المغرب تعبت وصار معي الم شديد جدا بجنبي الايسر واخذت المسكن بدون فايده شفت الدرين مسدود او مطوي وكيس الدم فاضي فناديت المضمده فقالت يمكن منه الالم جاء الدكتور المنواب وفتح الدرين وسحب بإبرة وعمل غيار للجرح وبعدها حسيت بتحسن ونمت على طول

اليوم الرابع ...شالو البايب الموصول بجنبي الايسر كنت متوقعه الم اكثر لكنه عادي يحتمل وكنت متوقعه ان الالم او الشد بجنبي الايسر سوف يزول لكنه خف ومازال موجود ويزيد عند آخذ نسم عميق او بالجلوس والوقوف لكنه يحتمل جاء دكتور سلطان وطمني على كل شي ومازل بإجازة لكنه حب يسلم علي لان بالليل راح اسافر وطلب مني الدكتور امشي كثير يعني بالساعه 10 دقائق لعدم حدوث جلطه بالرجل ويقول احنا نعطي اللي اوزانهم كبيرة ابره مسيله للدم حتى لمن يرجعون البيت لكن انت ما تحتاجينها بس عليك بالمشي ، بعده جت خبيرة التغذيه ماقصر ت معاي وفهمتني النظام وكتبته لي وردت على جميع اسألتي وبالمساء طلعت من المستشفى وعلى طول رجعت لأرض الوطن والحمدلله الطريق كان سهل ومافي اي مشاكل بس دخلت البيت رحت على الميزان والا وزني ما تحرك 104 كيلو وتذكرت كلام الدكتور قال ماراح ينزل الوزن بعد العمليه مباشره لان الجسم محتفض بالسوائل

اليوم الخامس .... كنت احس بصعوبه بالنوم بالفراش وكنت انام بوضع كأنني جالسه وهو الوضع المريح لي وذلك بإحساسي بشد بناحية خاصرتي بناحية اليسار وكان شاد معاي ويزيد اذا اخذت نفس عميق وبالحركه وتغير وضعي من الجلوس للنوم او العكس وكان يزيد الالم بصورة ما تحتمل مرتين باليوم وفي مسكن بس آخذه نص ساعه يزول الالم وبهذا اليوم بدأت أخذ المضاد الحيوي كل 12 ساعه وحبه للمعده ولم استطع آخذ الفيتامين وهو على هيئة فوار وطعمه مثل البندول المذاب بالماي

اليوم السادس ... في هذا اليوم حسيت بدوخة بصيطة خفت وغصبت نفسي على شرب السوائل المسموحه وشربت الفيتامين وطول اليوم شبعانه ما حسيت بجوع نوعت بالاكل اخذت جلي خالي من السكر وعصير برتقال وتفاح كل على نص أقلاص وشوربه خفيفه جدا ومطحونه ، امس و اليوم جسمي فقد سوائل كثير وانتو بكرامه دخلت الحمام وايد وبآخر اليوم انصدمت من وزني صار 102 كيلو

اليوم السابع .... اخذت بهذا اليوم سليم فاست كانت ناصحتني فيه خبيرة التغذيه واحس انه مدني بالطاقه وكنت اعاني من الغازات فاتصلت على خبيرة التغذيه وقالت لي طبيعي لان الجسم بوقت العمليه يتفخونه بالغاز وهذا المتبقي من الغاز ، قالت شربي شاي نعناع وشاي مراميه واي شاي اعشاب ترتاحين له وتقدرين تضيفين سكر لوفات وقالت كثري من المشي لان المشي يطرد الغازات

اليوم الثامن .... طبعا انا ما حسيت اني عامله العمليه خارج دولتي لاني كل يوم والثاني يا انا متصله على الدكتور اسأله او هو يتصل يتطمن بنفسه علي وفي هذا اليوم اتصلت على مكتب الدكتور وكلمت سكرتيرته سألتها هل طبيعي ان ما اخرج الفضلات لمدة ثلاث ايام وما احس اني محتاجه لهذا الشي سألتني هل يوجد انتفاخ بالبطن وانت متأذيه قلت لها لا فقالت طبيعي لان نسبة الاكل اوالسوائل قليله وانتي مو قاعده تاخذين سوائل كثير فالجسم محتاجها ومافي مجال لتكوين الفضلات وحاولت ازيد نسبة السوائل وخاصه عصير البرتقال علشان اقوي جسمي

اليوم التاسع ... ملتزمه بالتعليمات والدوا والفيتامين وحالتي احسن من قبل والغازات قلت لاني على طول امشي

اليوم العاشر .... الالم بجنبي الايسر خفيف وانا ما اقول عنه ألم بس اشبهه بالشد العضلي اللي ماسك وما يروح وبهذا اليوم وزني 99.8

اليوم الحادي عشر ... نفسي مسدوده على الاخر وماني قادره اكمل نص اقلاص عصير وبهذا اليوم طلعت وسقت سيارتي وقضيت مشوار جريب والحمدلله كل شي تمام بس كنت امشي بالسيارة اشوي اشوي وكنت خايفه اتألم بمكان الجروح ونفسيتي ممتازه لاني حسيت اني رديت لطبيعتي ومارست حياتي الطبيعيه

اليوم الثاني عشر ... حاولت ازيد من السوائل عوضا عن امس وبس صحيت حسيت بدوخه بصيطه وزني 98.3

اليوم الثالث عشر ... شربت حليب بالشاي نص كوب – ونص علبة زبادي قليل الدسم – وربع كوب الفيتامين – ونص كوب شوربة خلاصة الدجاج "ماجي" – وربع كوب جلي بدون سكر ورشفات من الماء وهذا طول اليوم

اليوم الرابع عشر .... اليوم بدأت بالاكل المهروس واول شي مهروس دخل معدتي الصغيره حمص 7 ملاعق صغير جدا وحسيت بتخمه وامتلأت معدتي فحمدت ربي وشكرته على الشبع لان ماكنت اشبع بسهوله وانا الحين نحيفة ووزني 60 كيلو ولله الحمد انا مبصوطة وزوجي مبصوط

هاذي يومياتي طرحتها ليستفيد منها الغير

الله يعطيك العافية على القصة غناتي فعلا الرجيم ارحم من الالام.... بس الحمدلله النتيجة سليمة

شكرا لكن اخواتي عذاب ---- الحايكية

كلامك صحيح اختي رموووووووووووسة
شاكرة مرورك

thanxxxxxxxxxxxxxxxx