تبت يد الكاتب وراعي الجريده‎

[align=center]قصيده أكثر من رائعه .. عجبتني وحبيت انقلها لكم



تبت يد الكاتب وراعي الجريده


لا بو القصيد إان كان ماجاد هالحين ولا بو القلم إن ماجرى بالقصيــده

إن كان ماسطرت بختم النبييـــــــــن قصيدتـ(ن) ما جا بعدها قصــيـــده

عامين أحاولي على بيت عامين من كثر حبه كيف أببدى القصيده

لون قدره ما يوفى بملاييــــــن من القصايد والمعاني الفريـــــــده

ولو القصايد سيل من نجد للصين أصغر من أظفر خنصره ماتزيــــــده

هذا الحبيب الصادق الفذ الأمين هذا الشفيع عند الولي في عبيده

هذا أشجع اللي حولوا في الميادين وليا رِكب بالخيل يرهب طريـــــده

لا هابت الشجعان والصف صفين يقدم أبو القاسم ويكسر ضديـــده

و يومـ(ن) ربي مكنه خير تمكين ما سل سيف إلا لروسـ(ن) عنيده

كم غزوة أنهاها بقتلى قليلين حقن الدماء ماغير شخصه يجيـــده

يومـ(ن) حرب الكفر تدمر ملايين لا والله إلا كل شيـ(ن) تبيـــــــــــده

أقروا لنا التاريخ وشوفوا الدواوين مين غيره اللي أقام أمة تليـــــــده

أعظم سياسي ساس ناسـ(ن) سلاطين الين ساوى كل عبد(ن) بسيـــــده

أقام معنى العدل بخطبه وحرفين لو إن فاطمة من سرق لأقطع إيـده

و أعظم ديمقراطي عرفته القوانين المعترض لا صاب رايه يشيــــــــده

ولا إنفرد بالراي وصحبه شويرين الأمر شورى والقياده رشيـــــــــده

في مجتمع مابه قوي وضعيفين الفضل للتقوى ومن يستزيــــــــده

حليم ما يغضب إلا بثنتين لا مس حد الله وظلمن يعيـــــــــده

دمس الخلق جمع مهابه على لين وصبر على قومه سنين مديـــــــده

صبر على أذى القربى ويا البعيدين ولا دعى بدعوه إلا حميــــــــــــــده

جاه الملك قال أطبق الأخشبين عليهم مثل الزرع لا جا حصيـــــده

قال من صلبهم يارب جيب الميامين من ترخص الأرواح لدينك شهيـــده

رحوم شفقـ(ن) كاملـ(ن) بالمضامين رحمة و أراد الله بها عبيــــــــــــــده

أدبه ربه وكمله خلق ودين ومن خلقه القرآن مابه نقيــــــــــده

ما ينطق إلا وحي منزل بتبيين فصل لنا القرآن وقرب بعيــــــــــــده

وما فيه شيـ(ن) جابه العلم هالحين إلا وسيد الخلق جايب مفيـــــــــده

رتب لنا حياتنا دنيا ودين وعلمنا كيف نعيش عيشة سعيـده

بأمي وأبوي وكل من كان غالين وبعزوتي وقبيليتي والبــــــديــــــده

نفديك يا شفيعنا في الموازين في يوم تذهل مرضعة عن وليـــــده

والناس نفسي نفس والكل وجلين في موقف تشيب فيه الوليــــــــــده

وأعتذروا أهل العزم رسل ونبيين والموقف أهواله طوال وشديــــــــده

قال الشفاعه لي وأنا مكمل الدين وعطاه ربي كل شيـ(ن) يريــــــــــده

قل للخبيث إبن النجوس الملاعين ذمك فلا ينقصه يرفع رصيـــــــــــــده

زادوا هل النصره وزادوا المحبين و إنت على رسمك تشق وتعيـــــده

من صورة الكوثر وهي بس سطرين ردن من الله لكل راعي مكيـــــــــده

أبتر نعم أبتر من قال بك شين يا صاحب الكوثر ومرسي العقيـــــده

صلوا وصلوا ثم صلوا وقولوا آمين تبت يد الكـــــاتب وراعــــي الجريده





ال شاعرة: العاتي المطيري

ما نقول فالك المليون يالعاتي .. لكن نقول فالك الشفاعه ان شاء الله..[/align]