في خلال أربعه أشهر أتوصلت لبعض الحركات التي تساعد في سرعة الترتيب

حبيباتي ابقلكم على الحركات بس ها مو تقولون هذي وحده كسوله ولاّ عارفينها ما جبتي شي جديد ترى أنا هذا الكلام يحطمني .....اتفقنا :
1-اذا غسلت الملابس أعلقها بعلاقات يعني كأني بحطها
في الدولاب وأنشرها بهذا الوضع.ولمن تجف تمام أوديها الدولاب بدون كوي .وكل ملقيت نفسي فاضيه كويت الأشياء المهمه أولا زي ملابس زوجي . بتقولون وش الفايده أقولكم ...عشان سلة الكوي تقعد فاضيه على طول بعدين تطفشون منها وترمونها.....وكمان لمن أبغى قطعه القها بسرعه ماأقعد أنكش السله وردها....
وكمان الكوي يسير أسهل لمن تنشف القطعه وهي في علاقه يعني التجاعيد قليله .


2-هذي الفكره سرقتها من واحد شيف كان يشرح طريقة تقشير السمك يدخل السمكه في كيس ويقشرها فيها عشان القشر مايملي المكان .وانا حقيقة اشتري السمك مقشر بس استفدت من الفكره في تقشير الخضار يعني أحط كيس تحت طرف لوح التقطيع واخليه مفتوح وابدى أقشر
ودف القشر في الكيس.

3-البصل وياكرهي لتقطيع البصل شوفوا حبايبي كيف حليت مشكلتي معه برمضان(قمت قشرت كل البصل الي عندي وفرمته بالمفرمه وجبت اكياس صغيره تنقفل بالكبس على طرفها وقسّمت البصل في الأكياس بكميات متساويه وبحيث يكون كل كيس يكفي طبخه واذا ما كفى ممكن استخدم أكثر من واحد المهم فردت البصل بالكيس بحيث يكون زي الورقه وصفيت الأكياس فوق بعض وحطيتها بالفريزر......طيب وش الفايده من ذا الحركه أقولكم
1-اختصار الوقت عند الطبخ
2-توفير الكثير من المجهود يعني بدل ما كل يوم تستخدمين المفرمه مرتين
ثلاثه ..وكل ما استخدمتيها تغسلينها وهات يادموع وريحه...الخ اسحبي
فقط الكيس واستخدميه وادعيلي.

4-فيه فكرة لغسيل القطع الصغيرة..
توجد بالسوبرماركت كيس مخرم بسحاب ..
تضعين به الشرابات أ والقطع الصغيرة مثل مريلة البيبي وتقفلين عليها السحاب.
وترمينها بالغسالة تتغسل مع باقي الغسيل. مايحتاج تكسرين ظهرك لقاع الغسالة ..
وبعد ذلك تدخلينها النشافة .
ولا يضيع وقتك تدورين على الفردات المتشابهه .

فكرة الملابس أسويها مع الملابس البوليستر والقطن ..
حتى إنها مفيدة ... ماتاخذ الملابس مكان على خيط الغسيل.

5-حركه رهيبه في تنظيف الترامس تبع القهوه والشاي
كان عندي ترمس أسوي فيه حليب ومره حبيت أحط فيه شاي عشان بنطلع البر وما ابغى استخدم الترامس السنعه
بس تعرفون الشاي في ترمس كان يتسوى فيه حليب ما يطلع تمام المهم
قالت الله يسلمها غسليه أول مره عادي بالفرشه والفيري ثم حطي ملح خشن مره وشوي ماء ورجيها الين تتمصعين
وردي أغسليها مره ثانيه بالفيري وشوفــــــــــــــــــــــــــ ـــــي النتيجه نظافه تهبل.

6-..بالنسبه للتحف بمجالس النساء والرجال ...بدل عرضها ليل ونهار للغبار واتعب في تنظيفها يوم بعد يوم ...
احاول اجمعها في كرتونه مغلقه واغطيها بقماش ... واخلي المكتبة فاضيه ويسهل علي تنظيف المكتبة باي وقت مرورا بها من دون تكلف ...واذا عرفت بوجود ضيوف قادمين طلعت التحف ورتبتها من دون عناااااء ...

7-بالنسبة للنفايات الله يكرمكم ... يجب شراء اكياس زباله متوسطة الحجم .... لان لو كانت كبيرة وتعبات راح تتورطين من يطلعها لك ...زوجك بيرفض مثل اللي عندي اكره شيء عنده .. واطفالي صغار وانا اتعب من حملها الين باب الشارع ...

فمن الافضل تكون صغيره وكل يوم بيومه افضل واسهل واخف وانظف بعد ...

بالنسبه للمرا يات والزجاج ... هناك مساحات سهلة الاستعمال بسرعه امسحي واشطفي مثل اللي بيستعملوها العمال بمحطات الوقود يجون ينظفون بيها زجاج السيارة ...هاااه عرفتوها ...
والا اذا ماعندكم .. ممكن بالجرايد بسرررعه وانظف ...

الابواب الداخليه ...انا ابلل قماش بالفيري والجل الاخضر مع شوي ديتول .. وعلى طول مسح بكل سهولة وكل اسبوع مره يكفي .. ماعدا بابين بالبيت يبي لك يوميا .. مثل باب المطبخ وغرفة المعيشه والحمام لانها تستخدم باستمرار ...

بالنسبه لشجر الزينه والورود ... اذا تبينها جديده ونظيفه بالذات على قرب موعد الضيوف خذي قارورة رشاش (( مثل ماء الزجاج )) وعبيها ماء مع فيري وشوي خل ابيض وخضيهم وبخي على الورق والشجر وشوفي اللمعه والنظافه وبكل سهولة ...

اذا تبين ريحة البخور تبقى لمدة اطول حاولي دايما تكون اتجاه رايحة البخور على الستائر لكي تثبت الريحه ايام ...


والى هنا انتهت افكاري واذا افتكرت شيء فلي عودة باذن الله ..

عسى افكاري تعجبكم ...